Gizon bat mozkortuta agertu zen bere ehorzketan

Igeltsero brasildar bat hiltzat jo zuten trafiko-istripu batean, eta Parana estatuaren hegoaldeko Platina herrian lurperatu behar zuten. Gau osoan parrandan egon eta gero, albistea irratian entzun zuen lagun batek abisua eman zion eta ahal bezain azkar joan zen hilerrira. Berarekin nahasi zuten gizon bat lurperatu behar zuten bertan. Familiak kontratatu zuen ehorztetxearen gerenteak baieztatu zuenez, “senide batzuek zalantzak izan zituzten istripuan hildakoaren gorpua identifikatu behar izan zutenean, baina izeba batek eta lau lagunek bera zela esan zuten”. Igeltseroak ez zuen bizia galdu, baina haren apartamentuko jabeak (gorpua identifikatu zutenetako bat) haren arropa eta koltxoia erre egin zituen.
Zuek ez koltxoirik erre, Mintzakide Programaren 2009-2010 ikasturtea asteon amaitu arren, iraila-urrian izango gaituzue berriz hemen… eta kalean, euskaraz ahalik eta gehien biziz. Uda emankorra eta betegarria izan dezazuela!!!

Hainbat izenen jatorria ez dago argi Estatu Batuetan. Arizonaren kasuan, hainbat urtez Pima hizkuntzako ali shonak-ekin (‘iturri txikiaren tokia’) lotu izan dute batzuk; beste batzuk arizuma hitz aztekarekin (‘zilar tokia’), eta hirugarren batzuk, espainolezko árida zona-rekin (eremu idorra). 1979an, ostera, Renoko Unibertsitateko William A. Douglass ikertzaileak euskal jatorria izan zezakeela idatzi zuen, eta aritz + ona-tik etor zitekeela esan. Gauza frogatua da, nonbait, estatuak, izena, jabe euskalduna zeukan Arizona izeneko arrantxu batetik hartu zuela, eta gaur egun, gainerako teoriak hein batean baztertuak daudenez, euskal jatorriarena gelditu dela.

20.000 euro baino gehiago ordaindu zuten munduko lehen posta zigilu itsaskorrarengatik 2009an

22.900 euro inguru ordaindu zuten 2009an munduko lehen posta zigilu itsaskorra, penny black izenekoa, Londreseko Sotheby?s enkante-etxean. Enkantean ordaindutako preziorik altuena ostera, 60.000 euro inguru, egoera ezinhobean zeuden penny blue zigiluaren ale bigatik izan zen. Victoria Erreginaren soslaiaren irudia du penny black zigiluak, eta 1840ko maiatzaren 1ean kaleratu zuten Erresuma Batuan eta Irlandan erabiltzeko. David Bartonen bildumakoak ziren hiru posta zigiluak; 2008an hil zen gizonezko hau oso pertsonaia ospetsua zen filatelia munduan. Bere bildumaren zati handiena jarri zuten salmentan enkante-etxean (Britainia Handiko, Inperio Britainiarreko, Ameriketako Estatu Batuetako eta Suitzako aleak), eta 514.752 libera ordaindu zituzten guztiengatik (571.400 euro). Bildutako diru guztia ongintzarako erabiliko dute.

Emakumeentzako baino ez diren taxi arrosak Mexikon

Puebla hiri mexikarreko kaleetan arrosa koloreko 35 taxi daude. Emakumeek baino ezin dituzte erabili eta gidatu. Segurtasun faltak eragin du ideia hau eta dagoeneko Mexikoko toki batzuetan emakumeentzat soilik diren garraio zerbitzuak aurkitu ditzakegu, besteak beste, autobusak eta metroko bagoiak jendetza-orduetan. Segurtasuna handitzeko “auto guztiek GPS kokapen sistema, ikara botoia eta esku-diruaren erabilera saihesteko banku-terminalekin daude ekipatuak”, azaldu zuen Eduardo del Castillo Pink Taxis enpresako zuzendariak. “Taxien atzealdeko eserlekuaren aurrean ispilua dute makillatu ahal izateko, eta etorkizunean emakumeen erabilerako gauza gehiago ezartzea ere pentsatzen ari dira”, Humberto Vargas Pink Taxis enpresako zuzendari Komertzialaren arabera. Ideiak arrakasta handia izan du Pueblan eta Mexikoko beste hirietan jartzea aztertzen ari dira.
Mexikon, Japonian bezala, ordu zehatz batzuetan metroko bagoi batzuk ere, emakumezkoentzat baino ez dira eta polizia arduratzen da bidaiariak kokatzeaz.

Jack Nicholsonek zinean egin zuen lehen lana Tom eta Jerryren jarraitzaleen gutunei erantzutea izan zen

Oso gaztetatik, Jack Nicholsonek aktore izan nahi zuen. Beraz, institutua utzi zuenean, Hollywoodera joan zen bizitzera, zinemaren munduan arrakasta izateko asmoz… baina bere hastapenak ez ziren errazak izan. Hollywoodera iritsi bezain laster, Metro Goldwyn Mayer produkzio etxean lan egiteko kontratua lortu zuen, baina ez aktore bezala lan egiteko. Animazio saileko bulego batean jarri zuten, eta Tom eta Jerry marrazki bizidunetako pertsonaien jarraitzaileen gutunei erantzutea zen bere lana. Egia esan, ez zen Hollywoodera joan zenean Nicholsonek zuen ametsetako lana, baina behintzat New Jerseyko lagunei zineman lan egiten ari zela esan ziezaiekeen. Lan horretan, Jack Nicholsonek astea 30 euro irabazten zituen. Diru hori ongi etorri zitzaion, bigarren mailako filmetan paper txikiak lortzen zituen bitartean. Urte asko, eta pelikula asko pasatu ziren Nicholson egun den izarra bilakatzeko. Eta bere soldata asko igo da, izan ere orain batezbesteko hamar milioi dolar irabazten ditu pelikulako.

Alfred Hitchcockek ez zuen zilborrik

Diotenez, Psicosis filmaren zuzendariak gaztetan galdu zuen zilborra, sabelaldean ebakuntza egin ziotenean. Antza denez, operaziorako ebaketak zilborrean egin zizkioten eta, ebaketok orbaindu zirenean, zilborra desagertu egin zen. Hitchcocken zilborrari buruzko pasadizoa hain da harrigarria, ezen askok pentsatzen duela hiri-kondaira dela. Baina, zinegile honen bizitzan egiazkoak diren eta hiri-kondairak diruditen beste hainbat xehetasun daude. Adibidez, berarekin lan egiten zuten emakumezko aktore politei tratu txar psikologikoak ematen zizkien, beraiekin sexu harremanak izan nahi zituelako eta bazekielako, bere fisikoarekin ez zuela inoiz lortuko. Beste xehetasun kezkagarri bat: Hitchcock itotzearekin obsesionatuta zegoen. Bere 17 pelikulatan itotzeak azaltzen dira. Suspensearen Magoak aitortu zuen berak gustokoen zuen hiltzeko modua zela. Gainera, zinegilea sarritan azaltzen zen argazkietan norbait itotzen ari zenarena egiten, baita familiako argazkietan ere!

Russell Crowek bizikletaz desafioa egin zion kazetari bati

Annette Sharp zutabegileak sasoi onean ez egotea eta buruan erretzea eta takoak jatea besterik ez izatea egotzi zion Russell Croweri. Egia da Gladiator filma egin zuenetik kilo batzuk hartu zituela, baina Daily Telegraph egunkari australiarrean kaleratu zuten informazioa ez zuen batere ondo hartu: bizikleta gainean erretzen eta takoak jaten atera zuten. Kritikari erantzuteko, aktorearen laguntzaileak kazetariari deitu zion, aktorearen izenean, eta bizikleta hartuta aktorearekin joateko gonbidapena egin zion. Crowek 20,3 kilometroko lasterketaren desafioa irabazi zuen eta horrela konpondu zen bien arteko haserrealdia.

Michael Jacksonek Albert Einsteinen begiak erosteko eskaintza egin zuen
Michael Jacksonek Einsteinen begiak eskuratzeko 5 milioi dolarreko eskaintza egin arren, ez zituen lortu, beste partaide batek eskaintza handiagoa egin baitzuen. Albert Einsteinen oftalmologoa izan zenak fisikari aleman handia hil (1955) eta autopsia egin ziotenean eskuratu zituen haren begiak, arrazoi zientifikoak argudiatuta. New Jerseyko banku bateko segurtasun kutxa batean 40 urtez gordeta izan ondoren, enkantean jarri zituen, aberasteko asmoz. Michael Jacksonek gauza bitxien bilduma zuen, eta horiek ere bereganatu nahi izan omen zituen. Besteak beste, John Merrickc “Elefante Gizona”ren hezurrak zituen Jacksonek gordeta.

Bazenekien, mintzakide, 1591. urtera arte sanferminak urrian ospatzen zirela?
Udazkeneko eguraldi txarrarekin nekaturik, iruindarrek herriko jaiak uztailaren 7ra aldatzea erabaki zuten 1591. urtean . Halabeharrez, data berdinean ospakizun erlijiosoa, feriaren zalaparta eta zezenak elkartzeak eman die Sanferminei gaur egun duten jitea.

Lehengo batean telebistari emandako denbora genuen mintzagai. Horrek zinemara garamatza. Agian, telebistan ematen dugun denbora pentsatzean, zinema ikusten (geure etxeko formatu txikietan ere) ematen duguna aparte kalkulatu beharko genuke. Orduan ez ginateke hain ezkor izango, agian. Baina, hori bai, aretoak jendez eskas omen dabiltza. Eta zuek zinemaz? Ikusi ez duenarentzako proposamena: Ander filma ikusteko modukoa da, zer pentsatzen ematekoa ere. Bizkaiera oso garbian eta gaztelaniaz, biak nahastuz. Zuek ikusi. Joanez gero, aholkua: azken abestia entzutera geratu ere.